Care Centre
Care Centre Rustenburg is ’n gemeenskapsorganisasie met ’n hart vir mense. Ons fokus daarop om hoop te bring, lewens te verander en individue en gesinne wat deur moeilike tye gaan, prakties te ondersteun. Deur ons verskillende programme en dienste skep ons geleenthede vir mense om weer op te staan, te groei en hul volle potensiaal te bereik. Van emosionele ondersteuning tot die ontwikkeling van nuwe vaardighede – ons begeerte is om mense toe te rus om met hoop en selfvertroue vorentoe te beweeg.
Ons glo dat ons saam ’n verskil kan maak. Deur liefde, omgee en praktiese hulp bou ons aan ’n sterker gemeenskap waar elke mens raakgesien, waardeer en ondersteun word.
Ons visie is om hoop in mense se lewens te herstel en hulle toe te rus om nie net te oorleef nie, maar werklik te groei, te floreer en voluit te leef.
Wil jy graag meer weet oor Agapé Care Centre en die verskil wat ons in die gemeenskap maak? Kliek gerus op die skakels hieronder om ons Facebook-blad en webwerf te besoek.
Kinderfees
Kinderfees is ’n gratis fees vir kinders vol pret, avontuur en Jesus!
Elke jaar, in die laaste week van die Julie-skoolvakansie, kom ons van Maandag tot Vrydag bymekaar by Laerskool Vastrap, van 06:30 tot 13:00.
Dit is ’n week vol fun, karakters, aktiwiteite, speletjies, nuwe vriende en natuurlik Jesus! ❤️
En die beste deel? Dit is heeltemal gratis!
Ons skep ’n veilige, vrolike plek waar kinders kan speel, ontdek, groei en leer dat hulle kosbaar en geliefd is deur Jesus.
Kinderfees — ’n gratis fees waar kinders kan pret hê, vriende maak en Jesus beleef!
Jeugfees
Jeugfees is ’n gratis fees vir tieners vol geloof, fun en onvergeetlike oomblikke!
Aan die einde van die Julie-skoolvakansie, van Maandag tot Donderdag, kom ons bymekaar van 18:30–21:00 vir vier aande wat jy nie wil misloop nie.
Verwag kragtige Praise & Worship, bekende sprekers wat ’n invloed maak en ’n groot verskil in Suid-Afrika maak, MC’s, fun, vriende en natuurlik baie geleenthede om saam te groei in jou geloof.
En ja — dit is heeltemal gratis!
Jeugfees — waar geloof, vriendskap en fun bymekaarkom. Bring jou vriende en kom beleef dit saam met ons!
Veldwinkel
Veldwinkel is ’n dag waar ons as kerk uitgaan na ons dorp om liefde prakties uit te leef.
Elke jaar gedurende November kom ons op ’n Saterdag by Dawid Brink bymekaar vir ’n groot uitreik waar ’n vrywilligerspan van meer as 100 mense saam dien.
Ons bedien minderbevoorregte mense in ons gemeenskap met kos, klere, omgee en gebed. Ons glo kerk is nie net iets wat binne die gebou gebeur nie — ons is die kerk wanneer ons uitgaan en ’n verskil maak.
